شړوه السمك

بكام ياحاجه شروة السمك دي على بعضها
كلهم يابني على بعضهم كدا ب ٤٠٠ جنيه علشان عايزه أروح..وخلي عنك خالص والله.
٤٠٠ جنيه ايه ياحاجه انتي مش عايشه معانا...محدش بقى لاقي الجنيه...خليكي حنينه كدا ..
والله يابني انا من صباحية ربنا وانا قاعدة بيهم كدا في الشمس وعاوزه اروح لعيالي...خدهم ب ٣٥٠ جنيه.
ياحاجه انتي فكراني أفندي!...دول اخرهم ٢٥٠ جنيه ...وابقى مكارمك كمان...عشان تروحي من الشمس.

يابني انا والله العظيم شارياهم من الصيادين ب ٣٠٠ جنيه وبسترزق منهم.. هات ٣٢٥ جنيه والله يباركلك في عيالك.
بقولك ايه هما ٢٥٠ جنيه ..هتاخديهم ولا أمشي !!
وهترجعي بيهم اصلا ...خلاص الوقت راح والدنيا هتضلم عليكي...ها!!
خلاص يابني هات ال ٢٥٠ جنيه ويعوض عليا ربنا ..
اخذهم البطل المغوار ب ٢٥٠ جنيه ورجع رافع راية النصر ودخل بيته وقابلته أم العيال وخدت منه السمك وقالتله ماشاء الله ايه دا كله !
قالها تصدقي ان كل دول ب ٢٥٠ جنيه!! قالتله لا ماتهزرش !! قالها والله زي مابقولك ...
قالتله ازاي دا الكيلو بس في السوبر ماركت ب ١٢٥ جنيه ودول مايقلوش عن ٤ او٥ كيلو !!!
قالها عيب عليكي انتي مش متجوزه اي حد.... انا محدش يضحك عليا!!!
ولنا هنا وقفة...
في حاجه اسمها جبر الخواطر
الست دي من صباح ربنا لاخر اليوم عاوزه تجيب مكسب تصرف منه على
بيتها وولادها وربنا اعلم ممكن تكون بتربي ايتام ومش عاوزه تمد ايدها للناس وتكسبها بالحلال
هى افضل من الف شحات بيلف يطلب من ده وده اي جنيه....
النهايه
رحم الله رجل سمح اذا باع سمح واذا اشتري...سمح إذا أقتضي
اعتبر نفسك بتتصدق عليها وبتساعدها
لوجه الله ...
جبر الخواطر لا يعلم أجره إلا الله..
وكل الموضوع مش مكمل حق ٣ او ٤ سجاير
ممكن تشربها في قعده واحده.
للاسف احنا بنتشطر على الغلابه بنتنافس في اننا نضحك عليهم ونفاصل معاهم فكرنها شطارة دا المثل بيقول يا بخت من كان زكاته فى بيعه وشړاه .
اجبر بخاطرهم يجبر بخاطرك ربنا محدش عارف ظروف الناس ايه وكلها بسيطة 
استقيموا يرحمكم الله